Azərbaycan xalqının, xüsusilə də gənclərin vətənpərvərlik, düşməndən qisas almaq hissini efir məkanını zəbt etmiş çal-çağır, şou-biznes əhli deyil, mənəvi verilişlər alovlandıra bilər.
Arannews - “Azərbaycan xalqının, xüsusilə də gənclərin vətənpərvərlik,
düşməndən qisas almaq hissini efir məkanını zəbt etmiş çal-çağır, şou-biznes əhli
deyil, mənəvi verilişlər alovlandıra bilər”
Qəlblərə hüzur bəxş edən, mənəvi zənginliklərlə dolu, insanlara İlahi rəhmət
və savab qazanmaq üçün geniş imkanlar tanıyan mübarək Ramazan ayını başa
vurduq. Amma təəssüf ki, bu orucluqda da Azərbaycan telekanallarının yayım
siyasətində dəyişikliklərin şahidi olmadıq. Yəni milli TV-lər bu il də Ramazan
ayı ilə bağlı heç bir xüsusi veriliş hazırlamadı. Yenə də əhalinin, xüsusən də
inanclı kəsimin mənəvi tələbatını ödəməyə biganə yanaşdılar.
Azərbaycan İslam Partiyası (AİP) Gənclər Təşkilatının sədri Vüqar
Abdullayev ötən illər ərzində telekanalların tənqidlərdən nəticə çıxarmadığını,
tamaşaçı çağırışlarına biganə yanaşdığını söylədi: “Ölkəmiz müstəqilliyini əldə
edəndən sonra bir çox sahələrdə əldə olunan yeniliklər özunu qısa zamanda büruzə
verdi. Həmin yeniliklərdən biri də teleməkandakı uğurlar idi.
Əsrin sonlarında Azərbaycanda bir-iki TV kanal fəaliyyət göstərirdisə, əsrin
sonlarında artıq telekanalların sayı onlarla ölçülürdü. Üstəlik,
televiziyaların müstəqil yayım hüququ onlara sərbəstlik verir, geniş imkanlar
yaradırdı. Əfsuslar olsun ki, bu sərbəstlik özəl kanalları cəmiyyət üçün zərərli
təbliğat maşınına çevirdi. İndi Azərbaycan efir məkanını mənasız, bayağı
şuo-proqramlar işğal edib. Nəzərə alsaq ki, yetişməkdə olan gənc nəsil məhz həmin
verilişlərin təsiri ilə böyüməkdədir, onda vəziyyətin nə qədər təhlükəli olduğu
göz qabağındadır”.
V.Abdullayev bildirdi ki, əhalisinin əksər hissəsinin müsəlmanların təşkil
etdiyi ölkəmizdə dini mövzulara yer verilmir. Baxmayaraq, efirdə milli-mənəvi,
dini məsələlərin təbliğ olunmasını istəyənlər çoxdur: “Əvvəllər olduğu kimi bu
ildə Azərbaycan xalqı Ramazan ayının fəzilətləri haqda televiziyalardan məlumat
əldə edə bilmədi. Hərçənd telekanallarda mübarək ayın ab-havasını yaratmaq, heç
olmasa, Ramazan ayında İslamın gözəl əxlaqından, orucluğun əhkamından, faydalarından
danışmaq, Qurani-Kərimin ayələrini, imsak və iftar vaxtlarında azanı, günün
dualarını və tərcüməsini səsləndirmək mümkün idi. Amma görünən budur ki, kanal
rəhbərləri bu haqda düşünmürlər”.
Müsahibimə görə, ən acınacaqlı hal yerli kanallarda ədəbsiz ifadələrdən
istifadə olunması, əxlaqdan, etik normalardan uzaq, mental dəyərlərimizə
sağalmaz zərbə vuran proqramların təqdim olunması, mənəviyyatın, ailə tərbiyəsinin
nə olduğunu bilməyən mügənnilərin, şoumenlərin xalqa əxlaq dərsi verməsidir:
“İş o həddə çatıb ki, efirdə kimin ağlına nə gəldi, danışır, kim necə gəldi,
geyinir. Adam öz ailəsi ilə birgə oturub telekanallarımıza baxmağa utanır.
Düşünürəm ki, aidiyyəti qurumlar belə neqativ hallara qarşı sərt ölçu
götürəcək, şou verilişlərin azaldılması, mədəni, mənəvi, intellektual
xarakterli, vətənpərvərlik ruhiyyəsini aşılayan proqramlara üstünlük verilməsi
barədə kanal rəhbərlərinə tapşırıq veriləcək.
Unutmayaq ki, 20% ərazimiz işgal altındadır. Onu da unutmayaq ki, Azərbaycan
xalqının, xüsusilə də gənclərin vətənpərvərlik, düşməndən qisas almaq hissini
efir məkanını zəbt etmiş çal-çağır, şou-biznes əhli deyil, mənəvi verilişlər
alovlandıra bilər. Biz cəmiyyətin fikrinin formalaşmasında televiziyanın təsirini
dana bilmərik. Əgər yerli kanallar veriliş islahatlarına getməsələr, xalqa
fayda verəcək proqramlar, layihələr üzərində işləməsələr, gələcək nəsil bir çox
milli-mənəvi dəyərlərin sadəcə adını eşidəcək, mənəviyyatsızlıq girdabına qərq
olacaq. Mənəviyyatsızlığın verdiyi bəhrə isə ətrafda baş verənlərə, ailəyə, vətənə
biganəlikdir”.