Mayın 19-da Bakıda çoxmərtəbəli binada baş verən yanğın nəticəsində 15nəfər oldu və 50 nəfər ağir xəsarət aldi. ölənlərdən ən yaşlısının 87, ən cavanı isə yaş yarımlıq körpə olub.
AranNews- Binəqədi rayonu, Azadlıq prospekti 200/36 ünvanında 16 mərtəbəli binada baş verən misli görünməmiş yanğının səbəbi ilə bağlı daha bir versiya irəli sürülüb.
15 nəfərin ölümünə səbəb yanğının binanın fasadı ilə çəkilmiş elektrik kabellərində yaranan qısaqapanmadan baş verdiyi iddia olunur. Bina sakinlərinin verdiyi məlumata görə, binanın arxa hissəsində fəaliyyət göstərən aptekin üstündəki elektrik naqilinin tüstülənməsindən sonra yanğın baş verib.
Bu arada binaya üzlük çəkən fəhlələr də sakinlərin bu iddiasını təsdiq edib. Onların sözlərinə görə, binaya üzlük çəkilən zaman elektrik naqillərinin birləşmə yerlərinin əksəriyyəti açıq qalıb və onların üstü bağlanmayıb.
Bakıda yaşayış binasında baş verən yanğınla bağlı həyata keçirilən istintaq və əməliyyat-axtarış tədbirləri Azərbaycan Respublikası Prezidentinin nəzarətindədir. Bu barədə Baş Prokurorluq, FHN və Daxili İşlər Nazirliyinin mətbuat xidmətlərinin yaydığı birgə məlumatda qeyd edilir.
Məlumatda deyilir ki, ki, 2015-ci il mayın 19-da, saat 11 radələrində Bakı şəhəri, Binəqədi rayonu, Azadlıq prospekti, 200/36 ünvanında yerləşən çoxmərtəbəli yaşayış binasında yanğın baş verib. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi, texnikası, Səhiyyə Nazirliyinin Təcili Tibbi Yardım xidmətləri cəlb edilib. Hadisə yerinin mühafizəsi və xilasedicilərin maneəsiz fəaliyyəti Daxili İşlər Nazirliyinin Çevik Polis Alayının və paytaxtın polis orqanlarının əməkdaşları tərəfindən təmin edilib.
Operativ surətdə həyata keçirilmiş tədbirlərlə binanın 27 sakini təxliyə olunub, 37 nəfər xilas edilib. Təxminən saat 14 radələrində yanğın lokallaşdırılıb, yaxınlıqdakı binalar yanğından mühafizə olunub. Bununla belə, ilkin ehtimallara görə binanın fasadından başlayan və qısa müddətdə böyük bir hissəsini əhatə edən yanğın nəticəsində 15 nəfər həlak olub, 26 nəfər isə yanıq xəsarəti və tüstüdən zəhərlənmə ilə müxtəlif tibb müəssisələrinə yerləşdirilib.
Hazırda binada xilasetmə tədbirləri və mənzillərin müayinəsi davam etdirilir.
Fövqəladə Hallar Nazirliyinin rəhbər vəzifəli şəxsləri, respublikanın Baş prokuroru və daxili işlər naziri hadisə yerinə çıxıblar.
Fakt üzrə Baş Prokurorluğun Ağır Cinayətlərə dair İşlər üzrə İstintaq İdarəsində Azərbaycan Respublikası Cinayət Məcəlləsinin 225.2-ci - ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma, 308.2-ci - vəzifə səlahiyyətlərindən sui-istifadə və 314.2-ci - ağır nəticələrə səbəb olan səhlənkarlıq maddələri ilə cinayət işi başlanıb, eləcə də Baş Prokurorluğun, Daxili İşlər və Fövqəladə Hallar nazirliklərinin təcrübəli əməkdaşlarından ibarət istintaq-əməliyyat qrupu yaradılıb. Araşdırmaların gedişi barədə ictimaiyyətə əlavə məlumat veriləcək.
Birgə məlumatda daha sonra qeyd edilib ki, qulluq mənafeyi tələb etdiyi halda səlahiyyətlərindən istifadə etməyən və istehsal etdiyi keyfiyyətsiz üzlüklərlə həmin binada fasadlama işləri aparmış “Global Construction” şirkətinin rəhbəri Miryusif Mahmudov iş üzrə şübhəli şəxs qismində tutulmuşdur.
