Arannews - Məhərrəm ayı, İslamın ona
borclu olduğu bir aydır. Aşura günü vasitəsilə özünə fərqli rəng alaraq başqa
aylardan seçilən Məhərrəm, ilin başlanğıcı olmaqdan əlavə bir tarixin
başlanğıcına çevrildi. Aşura qiyamı 61-ci qəməri ilindən bu günümüzə qədər bir
qaynar bulaq kimi mərifət və həqiqət teşnələrini doydurmuş, batil əleyhinə olan
haqq hərəkatlara ilham bağışlamışdır. İmam Xomeyninin (ə) rəhbərliyi ilə baş
tutan İslam inqilabı da Aşuradan qaynaqlandı. Onun qalarıqlı və möhkəm
dayanması da Aşura dərslərindən ibrət almağın sayəsindədir.
Aşura dərsləri hər zaman və hər yerdə
genişlənməkdədir. Çünki Aşura ədəbiyyatında gəlib: "Hər gün Aşura, hər yer
Kərbəla və hər ay Məhərrəm". Yəni ədalət sorağında olanlar həmişə batil və
zülmlə qarşılaşacaq və Aşura hadisələri həmişə tarixdə təkrarlanacaq. Bu cəhətdən
Aşura dindarların, xüsusilə də toplumun agah insanlarının öhdəsinə böyük və
ağır missiya qoydu. Hamı Aşuranı dərk etdikdən sonra özünü və toplumunu onunla
müqayisə etməli, Aşura ibrətlərini həyata keçirməyə çalışmalıdır.
Aşura dərsləri zaman və məkan tanımadan
həmişə öz ruh verən təsirlərini göstərməkdədir. Ədalətsevərlik, zülmlə mübarizə,
izzət, İslam və İslam dəyərlərini qorumaq, Allah yolunda şəhid olmaq, siyasət və
mənəviyyatı bir yerdə toplamaq, əmr be məruf və nəhy əz münkər Aşuranın əsas dərslərindəndir.
Aşuradan dərs götürməyin mənası budur
ki, Aşuraçıların dediklərini və rəftarlarını fərdi və ictimai həyatda örnək qərar
verəsən. Aşura hadisələrində biz elə qəhrəmanlarla rastlaşırıq ki, onlar öz söz
və rəftarları ilə bütün müsəlmanlara örnək ola biləcək böyük inqilablar yarada
biliblər.