bu gün İmam Museyi Kazımın (ə) qızı, səkkizinci İmam Rzanın (ə) bacısı Həzrət Məsumənin (ə) vəfat günüdür
Arannews - Xanımın əzəməti
barədə təkcə bu kifayətdir ki, İmam Rza (ə) xanımı "Məsumə"
adlandırmışdır
bu gün İmam Museyi Kazımın (ə) qızı, səkkizinci İmam Rzanın (ə)
bacısı Həzrət Məsumənin (ə) vəfat günüdür.
Həzrət Məsumənin (ə) həyatına qısa bir baxış
O həzrətin adı Fatimə, məşhur ləqəbi isə "Məsumə"-dir.
Atası, şiələrin yeddinci İmamı Musa ibn Cəfər (ə), anası isə səkkizinci İmam həzrət
Rzanın (ə) anası sayılan Nəcmə Xatundur (s.ə). Beləliklə də həzrət Məsumə (s.ə)
və İmam Rza (ə) bir ata-anadan dünyaya gələn bacı və qardaşdılar. Xanım hicri-qəməri
tarixi ilə 173-cü il, Zilqədə ayının 1-də müqəddəs Mədinə şəhərində dünyaya göz
açmışdır. Uşaqlıqda Bağdad şəhərində Harunun zindanında həbs olunmuş atasının şəhid
edilməsi hadisəsi ilə üzləşmiş və ondan sonra qardaşı həzrət İmam Rza (ə) onu
öz himayəsi altına alaraq saxlamışdır.
Hicri-qəməri tarixi ilə 200-cü ildə Məmun Abbasinin təkid və hədə-qorxularından
sonra İmam Rza (ə) sürgünə bənzəyən Mərv səfərinə düzəlmiş və yanında
Əhli-beytindən (ə) heç bir kəs olmayan halda Xorasana getmişdir. Qardaşının
hicrətindən bir il keçdikdən sonra, imam Rzanı (ə) görmək şövqündə olan həzrət
Məsumə (s.ə) Xorasana tərəf yola düşdü. O Həzrət, bir baxışdan həzrət Zeynəbə
(s.ə) bənzəyirdi. Çünki Yezid İmam Hüseyni (ə) mənfi simada tanıtmaq istədikdə
Həzrət Zeynəb (s.ə) öz əsirliyi, nitqi və Yezidin nöqsanlarını söyləməklə onu
ifşa etdi və həqiqəti xalqa çatdırdı. Həzrət Məsumə də (s.ə) ona bənzər bir iş
gördü. Çünki, Məmun İmam Rzanı (ə) zorla Xorasana aparmış, lakin xalqın gözündə
imama çox ehtiram göstərdiyini nümayiş etdirmişdi.
Həzrət Məsumə (ə) öz gəlişi ilə Məmunun İmamı Rzanı (ə) zorla
apardığını ifşa etdi. Xanım buyurmuşdu: "Məni Qum şəhərinə aparın, çünki
atamın belə buyurduğunu eşitdim: "Qum şəhəri bizim tərəfdarlarımızın mərkəzidir."
Beləliklə, karvan Quma tərəf hərəkət etdi. Qum şəhərinin böyükləri xanımın Quma
gəlməsini eşitdikdə şad oldular və o Həzrətin görüşünə çıxdılar və onu şövqlə
qarşıladılar. O həzrət on yeddi gün müddətində bu şəhərdə yaşamış və bu müddətdə
ibadətlə məşğul olmuşdur. On yeddi günlük qaldığı yerdə dərhal özü üçün bir
ibadətgah düzəldir və öz Yaradanı ilə münacata başlayır. Bu xanımın ibadətə nə
qədər aşiq olduğunu və Allah-Təala ilə söhbətə və rabitəyə nə qədər əhəmiyyət
verdiyini göstərir. Bundan əlavə, xanım ravi və mühəddisə (hədis nəql edən)
olmuş və bir çox mühüm hədislər o həzrətin vasitəsi ilə gəlib çatmışdır.
Bütün bunlara baxmayaraq, Xanım Məsumə (ə) qardaşı imam Rza (ə) ilə
görüşə bilmir və hicri tarixi ilə 201-ci ildə 28 yaşında zəhərləndiyinə görə şəhadətə
yetir. Amma onun 17 günlük Qumda yaşaması bu şəhəri müsəlmanların ən böyük
ziyarətgahlarından birinə çevirir. Xanımın fəzilətləri böyük olub. Amma biz
İmam Cəfər Sadiqdən (ə) Xanımın fəzilətinə dəlalət edən bir hədisi
oxucularımızın diqqətinə çatdırmaqla kifayətlənirik.
İmam Cəfər Sadiq (ə) buyurub: "Agah olun. Allahın bir hərəmi
vardır və o Məkkədir. Peyğəmbərin (s) bir hərəmi vardır və o Mədinədir. Əmirəl-Mömininin
(ə) bir hərəmi vardır və o Kufədir. Agah olun ki, mənim və mənim övladlarımın hərəmi
Qumdur. Bilin ki, Qum kiçik Kufədir. Agah olun. Behiştin səkkiz qapısı var və
onun üçü Quma açılır." Sonra İmam buyurur: "Qumda mənim övladlarımdan
Fatimə binti Musa (ə) adlı bir xanım dünyadan köçəcək və onun şəfaətinin bərəkətindən
mənim şiələrim hamılıqla behiştə daxil olacaqlar".
Xanımın əzəməti barədə təkcə bu kifayətdir ki, İmam Rza (ə) xanımı
"Məsumə" adlandırmışdır.