Mədəniyyət sahəsində əməkdaşlıq daha da genişlənərsə, hər iki ölkənin siyasi əlaqələri də inkişaf edəcək
Arannews - Azərbaycan Respublikasında İranın mədəniyyət sahəsində fəaliyyəti
üçün lazımi şərait yaradılıb.
bunu Bakıya səfərini başa vurub Tehrana qayıdan İran İslam Respublikasının
İslam Əlaqələri və Mədəniyyət Təşkilatının sədri Əbuzər İbrahimi Türkman deyib.
Türkman bildirib ki, Azərbaycanla İran arasında mədəniyyət sahəsində əməkdaşlığa
heç bir maneə yoxdur. Mədəniyyət sahəsində əməkdaşlıq daha da genişlənərsə, hər
iki ölkənin siyasi əlaqələri də inkişaf edəcək. İran, ölkənin istənilən şəhərində
Azərbaycanın Mədəniyyəti Günlərinin keçirilməsinə şərait yaratmağa hazırdır.
İranın İslam Əlaqələri və Mədəniyyət Təşkilatının sədri Bakıda keçirdiyi
görüşlərdə qarşılıqlı film həftələrinin, sərgilərin və mədəniyyətə həsr olunan
konfransların da keçirilməsini təklif etdiyini və bu təkliflərin çox müsbət
qarşılandığını bildirib.
Qeyd olunub ki, hazırda Azərbaycanla İran arasında dini sahədə əməkdaşlıq
haqqında protokol hazırlanır.
Azərbaycan Respublikasının Dini Qurumlarla İş üzrə Dövlət Komitəsinin sədrini
Tehrana dəvət etdiyini nəzərə çatdıran Ə.İ. Türkman bu səfər çərçivəsində
protokolun imzalanacağını bildirib.