Arannews - İranın Qərbi Azərbaycan ostandarı Qurbanəli Səadət ilə
Naxçıvan Muxtar Respublikası Ali Məclisinin sədri Vasif Talıbov arasında
keçirilən görüşdə qarşılıqlı həmkarlıqların genişləndirilməsi vurğulanıb.
Gələn ilin fevral-mart aylarında Naxçıvanda İranın xüsusi sərgisinin
keçirilməsi, Urmiyyə ilə Naxçıvan arasında qarşılıqlı mədəniyyət həftəsinin təşkili,
bağ məhsulları üzrə əkinçilik həmkarlıqlarının genişləndirilməsi, Naxçıvanda qənd
çuğunduru məhsulunun əkini və emalı üzrə müqavilənin yenilənməsi, balıqçılıq
sahəsində həmkarlıq və idman komandaları mübadiləsi tərəflərin müzakirələrdə əldə
etdikləri razılıqlardan olub.
İranın Naxçıvan Muxtar Respublikasındakı baş konsulu Mohəmməd Təqi Mohəmməd
Əli deyib: Qərbi Azərbaycan ostandarının səfəri ilə iki tərəf arasında gediş-gəliş
həcminin artması və müxtəlif sahələrdə əlaqələrin yüksəlişinin şahidi olacağıq.